toorkombuis

In die rolprent Women on the Verge of a Nervous Breakdown los ‘n radio-sepiester (Carmen Maura) se getroude minnaar haar vir ‘n ander, jonger minnares en sy probeer selfmoord pleeg. Sy maak vir haar gazpacho en moer ‘n hele bottel slaappille daarin. Maar sy kry nie kans om dit te drink nie. Die een vreemde besoeker na die ander daag by haar woonstel op en help hulleself aan die gazpacho. Op die ou einde sit sy met ‘n hele woonstel vol slapende siele en sy is nog springlewendig.

Ek vrek nie net oor die prent nie, maar oor hierdie lekker somersop ook. Dis vinnig en maklik om te maak. En dis ‘n malse ontploffing van smaak.

Vir die gazpacho (sonder die pille) het jy nodig

6 groot ryp tamaties, afgeskil
(jy weet natuurlik dat jy tamaties skill deur dit in kookwater te dompel en dan die skilletjies af te trek)
1 knoffeltoontjie
2 snye witbrood, fyngekap
1 groot ui
1 groen soetrissie
1 Engelse komkommer
90 ml olyfolie
60 ml (4 eetlepels) suurlemoensap
sout
rooipeper
440 ml tamatiesap

Verwerk die tamaties, knoffeltoontjie en brood in ‘n voedselverwerker. Sny ui en groenrissie in groot stukke en skil komkommer. Voeg by en verwerk saam met die tamaties. Gooi deur ‘n sif in ‘n groot opskepbak en verkoel in yskas. Net voor jy die gazpacho voorsit, meng jy die olyfolie, suurlemoensap, sout, rooipeper en tamatiesap saam en roer dit by die verkilde mengsel. Voeg ysblokkies by indien nodig.